Tuesday, 11 August 2020

நான் காதலித்த வார்த்தைகள்

 

நான் கதையோ கவிதையோ கட்டுரையோ படிக்கும்போது சிலவற்றை ரொம்பவே ரசித்துப் படிப்பேன் . சொல்லப் போனால் தீவிரமாகக் காதலித்தேன்   சில வார்த்தைகள்  கிட்டத்தட்ட ஒரு வாரம் : சில சமயங்களில் பல வருடம் கடந்தும் திரும்பத் திரும்ப மனதில்  ஓடிக்கிட்டு இருக்கும்

அது எங்க அம்மாகிட்டே இருந்து வந்த ஜீன்ஸின் விளைவு. 

இதில் இரு மொழித்திட்டம்  மும்தொழித்திட்டம் என்றெல்லாம் இல்லாமல் எல்லா மொழியிலும் சில வாக்கியங்கள் வார்த்தைகளை நான்  காதலித்தேன் .

உதாரணமாகக் காட்டில் காய்ந்த நிலா என்பதை   ஆளே இல்லாத கடையில் டீ ஆத்துறாங்க.. என்று பொருள் கொள்வதில்லை  . மாறாக Full many a flower is born to blush unseen  என்பதன் தமிழக்கமாகத்தான்  நான் நினைப்பதுண்டு .

தெலுங்கு இந்தி ஜப்பானிய மொழி எல்லாவற்றிலுமே அழகான வார்த்தைகள் கொட்டிக்கிடக்கின்றன த்சுந்தொக்கு என்ற   ஜப்பானிய மொழி வார்த்தை பற்றி முன்பே ஒரு பதிவு போட்டிருக்கிறேன் . அதன் லிங்க் இதோ . படிக்க விரும்புபவர்கள் படிக்கலாம்  http://abayaaruna.blogspot.com/2013/12/blog-post_25.html

இளம் வயதில் அந்த வயதிற்கேற்பப்   புதிதாக( அதான் இங்கிலீஷுலே ஓவரா ஸீன்போடறது  ) ஏதாவது ஆங்கில வார்த்தைகள்  கண்ணில் பட்டால் அதை அடுத்த ஒரு வாரத்திற்குப்  பாக்கிறவங்ககிட்டே வலுக்கட்டாயமாக எப்படியாவது உபயோகிச்சு பந்தா காட்டறது

 அவங்க பேந்த பேந்த முழிக்கிறது ,அட இவ இவ்வளவு அறிவாளியான்னு நம்பள பாத்து ஆச்சரியமாய் பாக்கிறது இதையெல்லாம்ரொம்பப் பெருமையா நெனச்சுக்கிட்டு இருந்தேன் .

டெல்லியிலே இருந்த போதுஎன் கூட வேலை செய்த பாதிப் பேருக்கு  இந்தி மீதுள்ள அதீத பாசத்தால் இங்கிலீஷ் எழுத்து ஆறுக்கு மேலென்னாலே சறுக்கிடுவாங்க . அப்புறம் கல்யாணம் குடும்பம் இத்யாதிகளை நடுப்பறயும் நிறையப்  படிச்சேன்  ஆனால் முரசு கொட்டிக்கிறதை விட்டாச்சு .

 அப்படி நான் ரொம்ப ரசிச்ச வார்த்தைகளில் ஒண்ணுதான். Serendipitous .

இதன் அர்த்தம் என்னவென்றால் நாம் எதோ ஒன்று கண்டு பிடிக்க என்று ஒரு ஆராய்ச்சியை ஆரம்பித்தால் தற்சயலாக முக்கியமான  வேறு ஒன்றைக் கண்டு பிடிப்போம் .மைக்ரோவேவ்  கொய்நைன் , எக்ஸ் ரே  பேஸ்மேக்கர் எலெஸ்டி (LSD) எல்லாமே இப்படிப் பட்ட கண்டு பிடிப்புகள்தானாம் .இதுபோலத் தற்செயலாகக் கண்டு பிடிப்பதற்கு இந்த வார்த்தை உபயோகிக்கிறோம்

இந்த வார்த்தையோட ஸ்பெஷாலிட்டியே  உதடுகள் ஒன்றோடு ஒன்று ஓட்டும். நாக்கு யதாஸ்தானத்தை விட்டு மேலே நகர்ந்து மேலண்ணத்தைத் தொடும் அப்படியே மேல் பல் வரிசையின் பின் புறத்தையும் ஒரு தட்டு லேசாத் தட்டிட்டு தான் திரும்ப பழைய பொசிஷனுக்கு வர முடியும் .   நான் காதலித்த வார்த்தை ஒன்னும் லேசுப் பட்ட வார்த்தை இல்லை .நிறைய பேருக்கு இந்த வார்த்தையே தெரியாது , அப்படியே கண்ணில் பட்டாலும் கண்டுக்காமா கடந்து போயிடுவாங்க .

சரி இப்ப எதுக்கு இந்த ஒரு வார்த்தைக்கு இப்படி தோரணம் கட்டி விழா எடுத்து அப்படீங்கிறீங்களா சொல்றேன்

 போன வாரம் ஒரு முகூர்த்த நாளில் நானும் தற்செயலாக ஒரு கண்டுபிடிப்பு செய்தேன் . பேப்பர் டிவி இதிலெல்லாம் வரவில்லை

எனக்குச்    சமையலறையில் டப்பாக்களில் பேர் எழுதி ஒட்டி வைக்கும்   பழக்கம்    உண்டு . மைதா என்று எழுதியிருந்த டப்பா ரொம்ப நாளாகத் திறக்கவே இல்லை . சரி இன்னைக்கு நான் (NAAN ) பண்ணிடனும் என்று நினைத்துக் கொண்டு அந்த மாவை ஒரு பாத்திரத்தில் கொஞ்சமே கொட்டினேன் . நான் ( NAAN )பண்ணலாமென் று கொஞ்சம் உப்பு சர்க்கரை   எண்ணெய் கருப்பு எள்ளு  பேக்கிங் சோடா பேக்கிங் பவுடர் எல்லாம் கர்ம சிரத்தையுடன் போட்டுக் கரண்டி கொண்டு பிசைந்தப்புறம் தான் தெரிந்தது அது மைதா மாவு அல்ல அரிசி மாவு என்று .

சரி என்னடா பண்றதுன்னுட்டு அதிலேயே கொஞ்சம் குடமிளகாய் பச்சைக் கொத்தமல்லி  தேங்காய்ப்பூ  எல்லாவற்றையும் சரியான அளவில் கொட்டிப்   பிசைந்து ஒரு அரிசி அடை மாதிரிப் பண்ணினேன் .   

பார்த்தால் பார்வைக்கு  எதோ ஒரு புது  மாதிரி  டிபன் போல  இருந்ததும்  இருந்த  டால்  ( நானுக்குத் தொட்டுக்க ணும் என்று பண்ணியது ) கூட்டு எல்லாவற்றையும் அணிவகுப்பு நடத்தும்படி செட் பண்ணி    ஒரு    போட்டோ எடுத்து என் மகன்கள் மருமகள்கள் இருக்கும் வாட்சப் குரூப்புக்கு  அனுப்பிட்டேன் ..போட்டோ    ஷூட்முடிஞ்ச  அப்புறமா எப்படித்தான் இருக்கு என்று சாப்பிட்டுப் பார்த்தால் சூப்பரோ சூப்பர் டேஸ்ட். 

தொட்டுக்கை எல்லாம் இல்லாமையே ஒரு அரிசி வடை   மாதிரி இருந்திச்சு   .

அப்புறம் இந்த வாரமும் ஒரு தடவை பண்ணி ஆசை   தீரச் சாப்பிட்டாச்சு.

.இப்ப சொல்லுங்க  உலக வரலாற்றில் இடம் பெறவில்லை என்றாலும்   என்  கண்டு பிடிப்பு ஒரு அமர்க்களமான  serendipitous கண்டு பிடிப்பு   இல்லையோ?

நான் செய்த serendipitous அடை இதோ


 


 

 

Sunday, 9 August 2020

பூ மாதிரி சப்பாத்தி

 


இட்லி  பூ மாதிரி பண்ணினோமே  இதையே கொஞ்சம் விரிவாக்கம் பண்ணி சப்பாத்தி பண்ணிப் பாக்கலாமேன்னு இன்றைக்கு முயற்சி பண்ணினேன் .

சும்மா சொல்லக்கூடாது நல்லாவே வந்திருக்கு , பூ  மாதிரிஇருக்கு

 ஆனால்  வட்ட வடிவச்   சப்பாத்தியைப்   பூ வடிவத்தில்    கொண்டு வருவதற்குக் கொஞ்சம் மெனக்கெட வேண்டியிருக்கு  முதல் சப்பாத்தி ஒரு மாதிரியாக ஆனால் பரவாயில்லை ரகத்தில் சேர்த்தி

இரண்டாவது ஓகே . 



பூ வடிவத்திற்காகச்  சப்பாத்தியை ஆறாகக் கூறு போட்டுக் கொண்டேன் .பிறகு அதில் ஓரங்கள் கூர்மையாக இருக்கும் ஒரு எவர்சில்வர் கப்பு  கொண்டு .நுனிப் பாகத்தால் ஒரு  கால் வட்ட வடிவம் வருமாறு கட் பண்ணினேன் . நடுவில் ஒரு வட்ட வடிவத்திற்கு லிப் ஸ்டிக் டியூப் உபயோகித்து கிட்டத்தட்ட பூ மாதிரி இருக்கிறபடி பார்த்துக்கொண்டேன் .



   நான் உபயோகித்த உபகரணங்கள் இவைதான்  



எனக்குச்   சப்பாத்தி  தேய்க்கும்  கல்லில்   அவ்வளவாக மாவு     பரப்பிச்   சப்பாத்தி தேய்க்கும் வழக்கம் இல்லை  அதனால் சப்பாத்தி கல்லிலிருந்து எடுக்கவே சிரமமாக இருந்தது.  நாளைக்குச்    செய்யும் போது மாவு நிறையச் சேர்த்து தேய்க்கணும் .  

ஒட்டுப் போட்ட இடங்களில் லேசாகச்  சப்பாத்தி குழுவி கொண்டு தேய்த்தால் நாம் பண்ணின ஒட்டு வேலைகள் தெரியாது     

 இதே போல் ஹார்ட் ஷேப்பிலும் செய்தேன் அது கூட பரவாயில்லை ரகம் தான்.


Sunday, 2 August 2020

பூ மாதிரி இட்லி

எங்க பெரிய பையன் சின்ன வயசில் பண்ணிய அலப்பறைக்கு அளவே இல்லை . 
அவனுக்கு இட்லி தயிர் இது ரெண்டும் பிடிக்காது . 

 இட்லியாவது கொஞ்சம் பரவாயில்லை .தயிர் சாதம் பக்கத்தில் உக்காந்து யாராவது சாப்பிட்டால் ஓடிப் போய்விடுவான் . 

ஆனால் இட்லி உடம்புக்கு நல்லது என்று அவனை எப்படியாவது சாப்பிட வைக்கணும் என்று எங்க அப்பா வேறு ஏதேதோ ஜிஞ்ஜின்னாக்கடி வேலை பண்ணிப் பார்த்தார் , எதுவுமே நடக்கலை . 

 என் பையனின் நாக்கின் சுவை அரும்புகள்செம . கொஞ்ச வித்தியாசமான டேஸ்டாக இருந்தாலும் கண்டு பிடிச்சுடுவான் .

தக்காளி  ஜூசுஎன்றால் ரொம்பப் பிடிக்கும். 
 ஒரு தடவை  தக்காளி ஜூசுகேட்டான்
 தக்காளி எங்க ஏரியாவில் சில சமயங்களில் கிடைக்காது .
அப்படியே தக்காளி கிடைத்தாலும் சின்ன சைஸாக இருக்கும் எனவே சாத்துக்குடி ஜூஸில் கேசரிப் பவுடர் கொஞ்சமாகக் கலந்து கொடுத்தோம் .

 வயசு என்னவோ மூணு தான். இது பாத்தா தக்காளி ஜூசு மாதிரி இருக்கு சாப்பிட்டா சாத்துக்குடி ஜூசு மாதிரி இருக்குன்னுட்டு கண்டு பிடிச்சுட்டான்.

  அவனை ஏமாத்தறதும் கஷ்டமாக இருந்திச்சு . 

 எங்க வீட்டில இருந்த பணிமனுஷி வேறே எங்கே இருந்துக்கா இந்தப் புள்ளைய புடிச்சாந்தீங்க என்று விளையாட்டாகக் கேட்பாள் . 

 தினம் ஆபீஸ் முடிந்து வந்ததும் ஒரு பஞ்சாயத்து பண்ண வேண்டியிருக்கும் . சில நாட்கள் வினோதமான வழக்குகள் இருக்கும் பையன் அவளை பத்தியும் அவள் இவனைப் பத்தியும் குறை சொல்வார்கள் . நான் தார்மிக முறைப் படி என் பையனுக்கே சப்போர்ட் பண்ணுவேன் ..

 ஒரு நாள் சாயந்திரம் ஆஃபிஸ்லிருந்து வந்ததும் பையன் இந்த அக்கா இன்னைக்கு என்னை ஏமாத்தப் பாத்துச்சு , தாத்தா வேறே அக்கா சொல்றது தான் சரின்னாங்க பேசாம ரெண்டு பேரையும் ஊருக்கு அனுப்பிச்சுடுன்னான்.

ரெண்டு பேருமா சேந்து என் பையனை ஏமாத்தினீங்களாமே என்ன ஆச்சுன்னேன் .
 ம்....உன் பையனையே கேளுன்னாங்க . 
 எங்க அப்பாவுக்கு அன்னைக்கு எல்லா கிரகமும் நீச்சத்துலே போலிருக்கு 

பையன் அம்மா இன்னைக்கு காலையில என்கிட்டே வந்து தாத்தா “டேய் i தம்பி இட்லி சாப்பிடுடா பூ மாதிரி இருக்கு” ன்னு சொன்னாங்க. 

 பையன் சின்னப்ப புள்ள தானே அவன் எதோ சாமந்திப்பூ ரோஜாப்பூ மாதிரி இருக்கும்ன்னு நெனச்சுக்கிட்டு “சரி குடு”ன்னுருக்கான். 

இவங்க என்னா பண்ணியிருக்காங்க  எப்பவும் பண்ற அதே இட்லியைக் கொண்டாந்து தட்டிலே போட்டுக் குடுத்திருக்காங்க .

 இவருக்கு ஒரே ஷாக் . இருக்காதா பின்னே .

“பூ …பூ ன்னு சொல்லிட்டு இட்லியையே கொண்டாந்து வைக்கிறீயே என்னையா ஏமாத்தப் பாக்குறீங்க “அப்படீன்னு லா பாயிண்ட் எடுத்து விட்டிருக்கான் . 

 பணி மனுஷி சின்னப் பையன்னு நாம பேசிகிட்டு இருக்கிற எதிர் பார்ட்டி எவ்வளவு ஸ்ட்ராங்ன்னு தெரியாம “தம்பி இங்க பாரு மல்லிப்பூ மாதிரி சா ஃ ப்டா இருக்கு “ன்னு சொன்னதும் என் பையன் ரொம்பவே கடுப்பாயிட்டான் . 

சாமிகிட்ட இருந்த மல்லிப்பூவை எடுத்துக் கொண்டாந்து காமிச்சு எவிடென்ஸோட அவங்க தப்பா சொல்றாங்க . ஏமாத்தப் பாக்குறாங்க அப்படீன்னு புரூவ் பண்ணிட்டான். 

 மீண்டும் தளராத எங்க அப்பா இது பாருடா பஞ்சு மாதிரி இருக்கு அப்படீன்னுருக்காங்க . 

இவனும் விடப்பிடியா காட்டன் ரோல் கொண்டாந்து காமிச்சு “இது பஞ்சு இது இட்லி”ன்னு தெளிவா அறிவுப் பூர்வமா ஆதாரத்தோட ஒரு சுப்ரீம் கோர்ட் லாயர் ரேஞ்சுக்கு அசராம ஆர்க்யூ பண்ணியிருக்கான் . 

 உங்க அம்மா இட்லி யைப் பஞ்சு மாதிரி பூ மாதிரின்னு எல்லாம் சொன்னதே இல்லையா ன்னு எங்க அப்பா பணிமனுஷி கட்சிக்குத் தாவி விளக்கம் கேட்டிருக்காங்க 

 சிங்கிளா இருந்தாலும் சிங்கமில்லையா என் மகன் 

கொஞ்சம் கூடத் தயக்கமில்லாமல் "எங்க அம்மா பொய்யே சொல்லமாட்டாங்க இட்லியை இட்லிம்பாங்க பூவு பஞ்சுன்னெல்லாம் பொய் சொன்னதே இல்லை"யின்னு ஒரே அடியில் ரெண்டு பேரையும் ஆல் அவுட் ஆக்கிட்டான் .

 நாலு வயசிலேயே களத்திலே கடைசி வரைக்கும் நின்னு கலங்காம விளையாண்டிருக்கான் என் பையன் .

.அது புரியாம என்கிட்டேயே எங்க அப்பா "நான் பெத்த பசங்கள்லாம் இப்படி சரிக்கு சரி பேச மாட்டாங்க அப்படீன்னாங்க . 
 பஞ்சாயத்தில் தீர்ப்பு அடுத்தநாளைக்கு சொல்றேன்னு அவையை ஒத்தி வெச்சாச்சு. 
 அடுத்த நாள் காலையிலே சீக்கிரம் எழுந்து இது போல அழகா பூ மாதிரியான இட்லி பண்ணிவெச்சுட்டேன் . 




 யாருக்கும் தெரியாம மறைச்சு வச்சிட்டு என் பையன் எழுந்ததும் சம்பந்தப் பட்ட பார்ட்டிங்களைக் கூப்பிட்டு சொம்பில் தண்ணி துண்டு சகிதம் ஒரு கட்டிலில் உட்கார்ந்து நான் பண்ணிய பூ இட்லி யை டிஸ்பிளே பண்ணி.

 “இதோ இது தான் பூ மாதிரி இட்லி. எல்லோரும் நல்லா பாத்துக்கோங்க என் பையன் சொன்ன இட்லி இது தான் தப்பா புரிஞ்சுகிட்டு வெட்டியா என்பையனை வம்புக்கு இழுத்த ஒங்களுக்கு நாலு நாளைக்கு காலை பதினோரு மணி காபி கட் என்று தீர்ப்பு வழங்கினேன். 

தட்டில் இட்லிப்பூ . பையன் முகத்தில் மத்தாப்பு

Thursday, 30 July 2020

காபி எனும் மந்திரம் (தந்திரம்?)

வீட்டில் அமைதி நிலவ சண்டை சச்சரவு நீங்க இந்த மந்திரத்தை 108 முறை சொல்லணும் இந்த பரிகாரம் செய்யணும் இந்த நம்பருக்குப் போன் பண்ணினால் தீர்வு சொல்லப் படும் அது இது என்றெல்லாம் கேள்விப் பட்டிருப்பீர்கள் . 

ஆனால் இவை எல்லாவற்றையும் தாண்டிப் பலரது வாழ்வின் இன்றியமையாத பானமான காபிக்கும் அதே பவர் இன்னும் சொல்லப்போனால் கூடவே இருக்கிறது என்பதை இதைப் படித்தபின் நீங்கள் கட்டாயம் ஒத்துக் கொள்வீர்கள் .

 சில வருடம் நான் முன்பு ஒரு முறை என் நெருங்கிய உறவினர் ஒருவர் வீட்டிற்குச் சென்றிருந்தேன் . கணவன் மனைவி இருவருக்குமே காபி மீது அலாதி பிரியம் .

ஒரு இரண்டு நாட்கள் நான் அவர்கள் வீட்டில் தங்குவதாக பிளான். அவர்கள் தஞ்சாவூர் அருகே உள்ள ஒரு டவுனில் குடியிருந்தார்கள் .

.ஆனால் காபித்தூள் மட்டும் திருச்சியில் ஒரு குறிப்பிட்ட கடையில் மட்டும் தான் வாங்கு வார்கள் . எப்படியும் யாராவது திருச்சிக்கு அவர்களுக்குத் தெரிந்தவர்கள் அடிக்கடி போவார்கள் .

அவரின் மற்ற உறவினர்கள் தெரிந்தவர்கள் நிறைய பேர் தஞ்சையில் இருந்தனர்.அதனால் தஞ்சைக்குப் போவது என்பது அவர்களுக்கு அடுத்த தெருவுக்குப்போகிற மாதிரி. 

நான் போயிருந்த அன்று அவரின் கணவர் தஞ்சை சென்றிருந்தார் . போன மனுஷன் ராத்திரி 8 மணி ஆகியும் வரவில்லை . மனைவிக்கு சீக்கிரம் சாப்பாட்டை முடித்து விட்டால் மற்ற வேலைகளை எல்லாம் சீக்கிரம் முடித்து விட்டுப் படுக்கலாம் என்ற எண்ணம் . 

அதனால் 8 மணிக்கு ஆரம்பித்த திட்டு முதலில் ஸ்லோ ஸ்பீட்ல தான் போய்கிட்டு இருந்திச்சு. பிறகு கொரோனா ஸ்பீடுக்கு வேகம் எடுத்துச்சு . வார்த்தைகளின் வீச்சு நிமிடத்துக்கு 500 இருக்கலாம் . 

டின்னர் சாப்பிடும்போது கூடவே டெஸர்ட் குடுப்பாங்களே அது மாதிரி திட்டும்போது இதற்கு முன்பு எத்தனை தடவை இது மாதிரி லேட்டாக வந்தார் அதனால் குடும்பத்தில் ஏற்பட்ட தகராறுகள் இவைகளை தேதி மாதம் வருடம் வாரியாகப் பட்டியலிட்டு பயங்கரத் திட்டு . 

அதைக் கேட்டு என் பொது (வரலாற்று அறிவு? ) அறிவு ஏகத்துக்கும் வளர்ந்து விட்ட திருப்தி எனக்கு.

 நேரம் ஆக ஆக எனக்கு ஹோம் பிச்சில் ஹோம் டீம் வெளையாடற மேச்சைப் பாக்கறதுக்கு முன்னாடி ஒருஎக்ஸைட்மெண்டு  இருக்குமேஅது மாதிரி எக்ஸைட்மெண்டு .

நான் நினைத்தேன் இன்னைக்கு ஒரு சம்பவமோ சரித்திரமோ அல்லது ஒரு சம்பவமே சரித்திரமாகவோ ஆகப் போகுது.அந்த சரித்திரத்தின்  மகத்தான  சாட்சியாக நாம் இருக்கப் போகிறோம் . அப்படீன்னு மனசுல சொல்லமுடியாத கிளுகிளுப்பு. 

சரி முழிச்சுகிட்டு இருந்தா சண்டை சரியாப் போடாமா விட்டுட்டா ... த்ரில் . போயிடுமோ அப்படீன்னு நெனச்சுக்கிட்டு போர்வையைத் தலை எல்லாம் மூடற மாதிரி போத்திகிட்டு படுத்துத் தூங்கிற மாதிரி பாவ்லா காமிச்சுக்கிட்டு இருந்தேன் .
 உடம்பு கொஞ்சம் கூட அசையாத மாதிரி பாத்துக்கிட்டேன் . 

நாம அசந்து  தூங்கறோமுன்னு அவங்களுக்குத்  தெரியவேண்டியது முக்கியமாச்சே....
அப்புறம் சண்டையின் சுவாரஸ்யமே 
போயிடுமில்லியா
பத்தாததுக்கு    ரெண்டு கொசு வேறே எப்படியோ போர்வை உள்ளே பூந்துகிட்டு இம்சை பண்ணுது .... ம்ஹூம் நான் அசையவே இல்லை கொஞ்சம் கூட அசையவே இல்லை. 

ஒரு ஒன்பதரை மணி இருக்கும் ஸ்கூட்டர் சத்தம் கேட்டது. கணவர் வந்தார் . அவரும் முன் அநுபவம் காரணமா தற்காப்பு நடவடிக்கையா என்று சொல்லத் தெரியவில்லை . கூட அவரிடம் படித்த பையன் ஒருவனோடு தான் வந்து இறங்கினார் . கள நிலவரம் அறிய பையனைத்தான் முதலில் அனுப்பினார் . 

தான் ஸ்கூட்டரை நிறுத்தி விட்டு பின்னாடி வருகிற ரோல் அவருக்குப் போல ..வந்த பையன் நுழையும் போதே அக்கா " இந்தாங்க காபித் தூள் " 

திருச்சியிலிருந்து எங்க அண்ணண் வாங்கியாந்துச்சுக்கா . 
அவன் போன இடத்துலே வேலை மேல கொஞ்சம் லேட்டாயிடுச்சு .
 உங்க கிட்டே கொடுக்கச் சொல்லி என்கிட்டே கொடுத்தனுப்பிச்சான். 

அதான் சாரை எங்க வீட்டுல இருக்கச் சொல்லிட்டு அண்ணண் வீட்டுக்குப் போய் நான் காபித் தூள் வாங்கியாந்தேன் .. சார் எங்க வீட்டிலேயே சாப்பிட்டுட்டாரு அக்கா"

 ஒரு சூப்பர் ஃ பைட்டு சீன் வருவதற்கான  அத்தனை முகாந்திரத்தையும் எங்கேயோ இருந்து வந்த பயபுள்ள காபித்தூளை வச்சே சல்லி சல்லிய நொறுக்கிட்டான் .

 டயலாக் ஒழுங்கா போய்கிட்டு இருக்கான்னு ஸ்கூட்டரை ஸ்டாண்டு போட்டுக்கிட்டே கவனிச்சு கிட்டு மொள்ள தான் நுழையறாரு கணவர் .

 நாய் வேறே அவர்கிட்டே ஆசையாத் தாவுது அதல கொஞ்சம் வாய்தா வாங்கிக்கிறார் கணவர் . 

ஏன் அவங்க வீட்டிலே சாப்பிட்டீங்க இங்க தான் சாப்பாடெல்லாம் இருக்கே . இது மனைவி
 பையன் தான் முந்திக்கிறான் 'இல்லக்கா இன்னைக்கு எங்க வீட்டில பருப்புருண்டைக் கொழம்பு அதனால தான் அக்கா"

கணவர் பர் ஃ பாமென்ஸை பர்ஃபெக்டா பண்ணிக்கிட்டு இருக்காரு. லூசுத்தனமா வாயை தொறந்து மாட்டிக்கக் கூடாது என்பதில் செம கவனம் .

மனைவி கேக்கிற கேள்வி எல்லாத்துக்கும் பையன்தான் பதில் சொல்லறான் பையன் அன்னைக்கு ராத்திரி இவங்க வீட்டிலேயே தான் படுத்துக்கிறான்.(முழுப் பாதுகாப்பு கருதி?) 

எனக்கோ தாங்கவொண்ணாத துக்கம் . 

ஒரு 100 எலுமிச்சை பவர் கொண்ட விம் பளபளன்னு துலக்குதுன்னு அட்வார்டைஸ்மென்டு வந்தபோது நான் நம்பலை .

ஆனா இப்ப அதே பவர் ஒரு கிலோ காபித் தூளுக்கும் உண்டு என்று உரக்கச் சொல்லுவேன்

Saturday, 18 July 2020

குட்டி போடும் சப்பாத்தி


நாமெல்லாம் சின்ன வயசில் புத்தகத்தின் நடுவில்  ,மயில்  தோகையில் ஒரே ஒரு ஈர்க்கு வைத்து விட்டுக்  கொஞ்ச நாள் கழித்துப் புத்தகத்தைத் திறந்து பார்த்தால் மயில் குட்டி போட்டுடுச்சுன்னு குதூகலமாகக் குதிப்போமில்லையா ..

அது மாதிரி இன்னைக்குச் சப்பாத்தி பண்ணி தட்டுல வச்சிட்டு மத்த வேலை எல்லாம் முடிச்சுட்டு வந்து பாத்தா ஒரு மூணு குட்டி போட்டிருந்திச்சு .

சொன்ன யாரும் நம்ப மாட்டாங்கன்னு தான் போட்டோ போட்டிருக்கேன். அதெல்லாம் நம்பறதும்  நம்பாததும் உங்க இஷ்டம் .


இந்த மாதிரி நிறையக்  கதைகள் என் பெரிய பையன் குழந்தையாக இருந்தபோது அடிச்சு விட்டிருக்கேன் . அவன் சாப்பிடுவதற்கு எங்களைப் படுத்திய பாடு கொஞ்ச நஞ்சமில்லை . வீட்டை விட்டு வெளியில் கூட்டிக்கொண்டு போனால் தான் சாப்பிடுவான் . ஒருஆறு வயது வரை பயங்கரப் படுத்தல் .

நாங்கள்அவனைச் சாப்பிட வைக்க ஒரு டப்பாவில் சாப்பாட்டை எடுத்துப்போட்டுக் கொண்டு    அவனைக்  கீழே  அழைத்துக் கொண்டு  போய் அபார்ட்மெண்டை   சுத்திச் சுத்தி வருவோம்.  

சாதம் இட்லி  இவைகளை எடுத்துக்கொண்டால்  கையெல்லாம் பிசு பிசுப்பாகிவிடும் .

ஸ்பூனால் கொடுப்பது வாகாக இல்லை .எனவே சப்பாத்தி பண்ணி எடுத்துக் கொண்டு போனோம் . இப்படித்  தற்சயலாகத் தான் அவனுக்கு சப்பாத்தி  பிடிக்கிறது என்பதைக் கண்டு பிடித்தோம்

இதைப் புரிந்து கொள்ளவே எங்களுக்கு அவ்வளவு நாளாச்சு . பிறகு சப்பாத்தி அதன் கூட விதவிதமான வட இந்திய சைடு டிஷு இருந்தால் பிரச்னை இல்லை . 

தயிர் அறவே பிடிக்காது.

ஹைதராபாத்தில் குளிர் நாட்களிலும் மழை நாட்களிலும் வெளியே போக  முடியாத போது வீட்டுக்குள்ளயே அவனைச் சாப்பிட வைக்க நாங்க செய்த ஐடியா தான் இந்த டிசைனர் சப்பாத்தி.

சாம்பார் ரசம்  இட்லி இவைகள் என்ன பண்ணினாலும் சாப்பிட மாட்டான் . இது மாதிரி டிசைன் டிசைனாகச் சப்பாத்தி  செய்து கொடுத்தால் கொஞ்சம்  சாப்பிடுவான் .




பிரெட்டில் வித விதமான சான்டவிச் அல்லது வித வித டிசைனில் உதாரணமாக வீடு ,  யானை, பூனை  மரம் இது மாதிரி.  


சப்பாத்தியில்  வாத்து குருவி தவிர  முக்கோணம்  சதுரம் இவைகளைக் கொண்டு அந்த நேரத்தில் என்ன தோணுகிறதோ அது மாதிரியெல்லாம்  பண்ணிச் சாப்பிட வைப்போம் .

 அப்போது ஆரம்பித்தது இந்த வழக்கம் .

இப்போது என் பேரன்   சரிவர சாப்பிட மாட்டேன் என்கிறான் என்று என் பையன் வருத்தப் படுகிறான் . 

லாக் டவுனால்  நாங்களும்  அங்கே போய் உதவி செய்யமுடியாது . 

அவனும் இங்கே வரமுடியாத நிலை . 

சரி என்று எனக்குத் தெரிந்த டிசைனில் ஃ போட்டோ அனுப்புகிறேன் . 

ஒண்ணரை வயது என்பதால்  15 நாட்களே  அங்கு இருந்த எங்களை மறந்துவிட்டான் . எனவே என்னால் முடிந்தது இது மாதிரியான டிசைனர் சப்பாத்திதான்  

 

 

 

 


Thursday, 16 July 2020

கடைசி பெஞ்சுக்கு வந்த கடும் சோதனை

கொரோனா இந்த உலகத்தில் தற்போதைக்குப் பல விஷயங்களைக்

காணாமல் போகச்செய்து விட்டது.

அதில்  முக்கியமான ஒன்று இந்தக் கடைசி பெஞ்சு .

கடைசி பெஞ்சு பசங்க அது ஆணாக இருந்தாலும் சரி பெண்ணாக

இருந்தாலும் சரி கடைசி பெஞ்சு  அப்படின்னாலே ஒரு 

எளக்காரமதான் பாப்பாங்க .

மக்கு பசங்க எல்லாம் கடைசி பெஞ்சுல தான் இருப்பபாங்க என்பது 

இந்தப் பள்ளி மற்றும் கல்லூரி களில்   இந்த  டிஜிட்டல் யுகத்திலும் கூட 

ஒரு எழுதப்படாத  ரூல் .

லாஸ்ட் பெஞ்சா   நீயெல்லாம்  . எருமை மேய்க்கத்தான் லாயக்கு  

என்றெல்லாம் கடைசி பெஞ்சு பசங்களைத் திட்டுவாங்க .

  ..கடைசி பெஞ்சு . பசங்களா சத்தம் போடாதீங்கன்னு திட்டுவாங்க . 

   கடைசி பெஞ்சு பாடத்தைக்   கவனிக்காம  அங்கெ என்னா  பண்றே

இதைச் சொல்லாமல் எந்த டீச்சராலும் பாடம் நடத்தியே இருக்க முடியாது  .

இங்கிலீஷ் மீடியம் ஸ்கூலில் இதையே க் ,ச் ,ப்  விடாமல்

இங்கிலீஷில் சொல்லுவாங்க அவ்வளவு தான்.

கடைசி பெஞ்சத் தவிர்த்து நாம் கல்வியின் வரலாற்றை எழுதவே முடியாது

இந்த ஆன்லையன் கிளாஸ் வந்தப்புறம் கடைசி பெஞ்சு காணாமல் போய் விட்டது . 

கடைசி பெஞ்சு கடந்து வந்த பாதை ரொம்பவே கரடு முரடான பாதை

 டீச்சருங்களும்   சில சமயங்களில் கடைசி பெஞ்சு  பசங்களைத்  திருத்தி

நாட்டையும் திருத்தறோம் அப்படீன்னு நெனெச்சிகிட்டு அப்படியே 

கடைசி பெஞ்சு பசங்களை முன் வரிசைக்கு வரச்சொல்லி  முன் வரிசை 

மாணவர்களைப் பின் வரிசைக்குப்  போகச்சொல்லி  

தோசை மாதிரித் திருப்பி போட்டு  விளையாடற  விளையாட்டையும் விளையாடுவாங்க .

அது கடைசியில் எதிர்மறை விளைவாக முன்னாடி ஒழுங்கா

உக்காந்திருந்த பசங்களும் டீச்சருக்கு  எப்படியெல்லாம் தண்ணி 

காட்டலாம்  என்கிற ஆய கலைகளில் அவசியமான அந்தக்  

கலையைக் கற்றுக்கொண்டு முதல் பெஞ்சுக்குத் 

திரும்பி வந்ததும் செயல் படுத்த ஆரம்பித்து விடுவார்கள் .

 

அதுவுமில்லாமல் காலம்  காலமாக கடைசி பெஞ்சுக்குத் தர வேண்டிய மதிப்பு  

மரியாதை ஒரு சமூக அங்கீகரிப்பு இல்லை என்றே சொல்லணும் .

.நாட்டில் எல்லாத்துக்கும் டேட்டா இருக்கு 

ஆனால் கடைசி பெஞ்சில் படிச்சு பெரிய ஆளானவங்க   எத்தனை பேரு

என்கிற டேட்டா இல்லவே இல்லை .பார்க்கப் போனால் ஒருமுக்கிய 

வரலாறு மறைக்கப் படுகிறது . இன்னைக்கு ரிசல்ட் கூட   

பெண்கள் தேர்ச்சி சதவிகிதம் பையன்கள் தேர்ச்சி சதவிகிதம் 

மாவட்ட வாரியாக தேர்ச்சி சதவிகிதம் அரசுப் பள்ளி மாணவர்கள்

தேர்ச்சி சதவிகிதம் என்றெல்லாம் இருக்கிறது 

ஆனால் முதல் பெஞ்சு மாணவர்கள் தேர்ச்சி சதவிகிதம்  

கடைசி பெஞ்சுமாணவர்கள் தேர்ச்சி சதவிகிதம்  என்று இல்லவே இல்லை . 

அந்த டேட்டா  எதுவுமே இல்லாமல் பொத்தாம் பொதுவா

கடைசி பெஞ்சு  மாணவர்களை இந்த சமுதாயம் பாரபட்சமாக  நடத்துகிறது

கடைசி பெஞ்சு இருந்தவரையாவாது  பாடத்தக் கவனிக்காத மக்குப் 

மக்குப் பசங்கல்லாம் யாருன்னு தெரிஞ்சுக்க     சரியோ  தப்போ 

காலம் காலமாக கடைசி பெஞ்சு  ஒரு அடையாளக் குறியீடாக

(அலகுக்  குறியீடாக)   இருந்தது 

இந்த   ஆன்லயன் கிளாசில் யாரு கவனிக்கிறா யாரு  

கவனிக்க மாட்டேங்கிறாங்க என்பதைக் கண்டே பிடிக்க முடியவில்லை .

அப்பப்போ மூஞ்சி திடும்ன்னு காணாப் போயிடுது  

கேட்டா எங்க ஏரியால கரண்டு கட்டு அப்படீங்கிறாங்க .

மொபைல் டேட்டா காலியாயிடுச்சுங்கிறாங்க

 வகுப்பறையில் கிளாஸ் நடக்கும்போது டீச்சர் கிட்ட சொல்லாம

வெளியே போகவே முடியாது . ஆனால் இந்த ஆன்லயன் கிளாசில்

  டீச்சர் தயவே தேவை இல்லை.

கடைசி பெஞ்சோட  அருமை அது இல்லாதபோது தான் தெரியுது .

 இத்தனை கடும் சோதனைக்கு நடுவிலும் கடைசி பெஞ்சுக்கு  ஆறுதல் 

தரக்கூடிய ஒரு சின்ன  விஷயம் எனக்குத் தெரிந்து   ஃபேஸ்புக்கில்  

தமிழில்  "கடைசி பெஞ்ச் மாணவன் " " கடைசி பெஞ்சர்ஸ்" "

கல்லூரியின் கடைசி பெஞ்ச் " என்று ஒரு மூணு குரூப்பு இருக்கு .

 

இங்கிலீஷில்   Last bench students da  ,Last bench students(danger), Last bench trolls,

Last benchers memes என்று ஏகப்பட்ட குரூப்புகள் இருக்கின்றன ,

 இங்கிலீஷ் மீடியத்தில் படித்தவர்களா எனத்தெரியவில்லை .



  இவ்வளவு  சமூக அக்கறையோட   கடைசி பெஞ்சு பத்தி எழுதறேனே 

அதனாலே நான் கடைசி பெஞ்சான்னு கேக்காதீங்க . 

நானெல்லாம் முதல் பெஞ்சாக்கும் . 

அறிவாளிங்கிற காரணமோ இல்லை ஆள் குள்ளமா இருந்த காரணமோ

தெரியல எப்படியோ முதல் பெஞ்சிலேயே காலத்தைக் கடத்திட்டேன்.